يبقى في حاجة غلط

Posted: December 18, 2011 in Uncategorized

 

هكذا رأينا الصورة

 

 

يبقى في حاجة غلط

لما المجلس لما جلس جاله نفس الحالة اللي كانت عند مبارك بالظبط “التصاق في المقعدة

لما المجلس الاستشاري لا يشار.. و الحكومة ذات الصلاحيات هٍيههي.. متحكمشي.. و المجلس “القلعة” للقوات المشلحة ميقدرش يحكم رغبات عساكره و ضبابيطه.. ألا قوللي ؟ هما مش بيقولو “الجيش أوامر” بردو؟

يبقى في حاجة غلط

لما “القائد” يعني القدوة.. يعني الاحترام و المثل الأعلى.. يعني اللي بيعلم الناس بأفعاله قبل كلامه.. يعني الأدب.. يعني الخلق.. يعني دين المعاملة- يبقى في الحقيقة كداب و بيهين تاريخ مصر و هو بيستغفلها في وقت يكون كدبه مفقوس من قبلها بساعات لأي عيل عنده 5 سنين وبيعرف يستخدم جوجل أو يفتح الانترنت.. وبتسأل ليه في شهدا عندهم 12 سنة؟؟

يبقى في حاجة غلط

لما “الموظف الحكومي” مهما علا شأنه يتكلم عن الثوار اللي عايزين يخلصوا من العصابة اللي مغيبة و مستولية على مصر و بتفسد فيها من أكثر من ثلاثين سنة و لحد دلوقتي- كأنهم “شوية عيال” ممكن الواحد يستمع لهم من منطلق الشفقة و “الأبوة”.. يا فندم خللي أبوتك في البيت و انت نازل .. انت موظف دولة و وظيفتك انك تسمع و تخدم الشعب مش تتشدق و تمّن و تجبّي عليه.. ولسة بتسأل “هما عاوزين ايه” ؟؟ عاوزين تغيير حقيقي يا فاندم مش ضحك عالشنبات و الدقون

يبقى في حاجة غلط

لما اللي نازل عشان يجيب: حق مصر اللي لسة منهوب.. و حق شهيدها اللي دمه مبردش.. و حق كل مصري داسه النظام و استباحه و جعل منه سلعة رخيصة داخل مصر و خارجها.. لما تنزل الناس الأطهار دي علشان ميتعملش فينا كده تاني.. و هما عارفين ان الحرية اللي عايزينها لمصر فيه ناس منهم حتموت و مش حتشوفها, بس على قلبهم زي العسل, و بيدافعوا عن حقي و حقك و يموتوا و هم بيضحكوا- وبدل ما نشكرهم بل بالعكس كمان يتشتموا و يتهزقوا و يتقال عنهم بلطجية من أي انتهازي أو ضعيف بيبرر خوفه- .. وبردو لسة بينزلوا ليصنعوا أمل مصر وارادة الله في التحرير.. ولسة الناس تشتم- فعلاً قوم تقتلون الأنبياء

يبقى في حاجة غلط

لما ننزل النهاردة علشان نجيب حق العشر شهداء.. اللي نزلوا يجيبوا حق الاربعين شهيد.. اللي نزلوا يجيبوا حق الألف شهيد اللي نزلوا من سنة علشان يجيبوا حق مصر.. ولسة عصابة الحرامية تقتل فينا.. و المتأسلمين و الاحزاب قاعدة على جنب بتعد في كراسي برلمان هلامي و الشعب بيموت.. بينما جنود الجيش تصنع مجداً جديداً في الإشارات البذيئة وقتل و سحل و تعذيب .. و خوفهم مش من ربنا أو حتى قدرتهم على العيش مع انفسهم بعد ذلك, و لكن يكون خوفهم الأكبر من الكاميرات, و من اللي بيصوروا حاجات ممكن تكون مستند اتهام ضدهم في يوم من الايام ؟ زي مثلاً نهشهم جسد مصر و سحلها واهاناتها, زييهم زي أي مرتزقة بنشوفهم في الأخبار مأجورين علشان يرهبوا الناس و يكسروهم بأحط وابشع الطرق.. هل ده حد تأمنه للدفاع عن عرضك و أرضك ؟ هل ده الأخ اللي ممكن يدافع عن الوطن ؟

يبقى في حاجة غلط

لما الناس اللي جايية تحكمنا ومرجعييتها على حسب قولهم للدين .. يتناسوا ان من اهم مقومات الدين هو نصرة المظلوم و كف يد الظالم.. وبدل ما يكونوا اثبتنا ايماناً في أرض المواجهة بين الخير والشر.. تلاقيهم قاعدين يشحتوا من الظالم كراسي يقعدوا عليها علشان يتفرجوا عالناس و هي بتموت.. ويقوللك “ضرب الجبارين بالجبارين” – لا يا عم الشيخ أحا دي أولى أعراض مرض “الإلتصاق المقعدي” .. و ده دلالة على مدى استفحال هذه الحالة فيكم اذا كان ده حالكم من قبل ما المقعدة تلمس الكرسي اساساً ! بقى هما دول اللي حيحققوا الحرية و العدالة و ينوروا النور ؟

يبقى في حاجة غلط

لما اللي بيحكمنا بيبقى منطقه “فرق تسد

لما علشان العصابة تعرف “تشكمنا” تقبض عالثوار و تحاكم الشعب عسكري وتموتنا بينما البلطجية لو دخلوا القسم يطلعوا بعد ساعتين حتى لو قاتلين قتيل ..وطبعاً ده كله غير المخلوع و كم “العدل” اللي لم تشهده مصر من قبل اللي بيتمتع بيه.. اللي لم يتمتع به حد قبله و لن يتمتع به حد بعده.. مع العلم ان دي ناس لا عمرها رحمت سن ولا ظروف و لا مرض

يبقى في حاجة غلط

لما الناس لسة بتستعبط نفسها علشان اتعودوا على العبودية و انهم يصدقوا كل حرف من كلام اسيادهم.. مهما تبين من الحقيقة.. و بدل ما يقولوا كلمة حق أو يسكتوا خالص.. يشتموا و يخترعوا اعذار للتشكيك و التبرير.. ماهو سيدك علشان حرامي و بيسرق حقك و حق اخواتك من ساعة ما وعيتوا على الدنيا, و بيخليكم تموتوا بعض علشان فتافيت أو عظمة يرميها كل فين و فين لما يحس انه اتزنق.. بس زي الكلب اللي ميعرفش يأكل غير من ايد سيده انت شايف ان الموضوع موضوع وفاء..

يبقى في حاجة غلط

و بيتهيألي كده كواحد متابع الموضوع من الأول.. لومفيش حاجة اتغيرت لحد 25 ينياير 2012 يبقى تقدر تقول ان خالتك سلمية ماتت

و لما الناس متعرفش تتكلم قبل ما نوصل لمرحلة الإنفجار اكبر دليل ان اكيد في حاجة غلط

لا تستوحشوا طريق الحق لقلة السالكين فيه ” – الإمام علي بن أبي طالب

 

 

  

  

 

 

 

 

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s